namaḥ śrī-kṛṣṇāya bhagavate śrī-rādhikā-ramaṇāya ||
śrī-janamejaya uvāca —
satyaṁ sac-chāstra-vargārtha- sāraḥ saṅgṛhya durlabhaḥ |
gūḍhaḥ sva-mātre pitrā me kṛṣṇa-premṇā prakāśitaḥ ||1||
anvayaḥ
[he gurudeva !] satyam ! durlabhaḥ gūḍhaḥ sac-chāstra-vargārtha-sāraḥ saṅgṛhya, me pitrā kṛṣṇa-premṅā, sva-mātre prakāśitaḥ |
dig-darṣanī
śrīmac-caitanya-devāya tasmai bhagavate namaḥ |
yad-rūpa-maṇim āśritya citraṁ nṛtyaty ayaṁ jaḍaḥ ||
śrī-kṛṣṇa-karuṇā-sāra-pātrāṇām atra gadyate |
sadā krīḍā-bharānanda-mādhurī-pūritaṁ padam ||
tasyaiva sarvataḥ śreṣṭha kaṇṭakoddhāra-pūrvakam |
nirūpayitum utkarṣam adhyāyāḥ sapta kalpitāḥ ||
tatrādye hy uttarā-praśnottara-rūpetihāsataḥ |
vaktuṁ goloka-māhātmyaṁ bhūr-loka-mahimocyate ||
grāmādhikāri-viprasya maṇḍaleśvara-bhūpateḥ |
samrājaś ca hareḥ pūjātyucca-vaibhava-varṇanaiḥ ||
ato’gre tanaye mātuḥ praśnāvataraṇāya hi |
pārīkṣitasya hṛṣṭasya praśno’śobhata jaiminau ||
rūpa-maṇiḥ ~ maṇivat śrī-rūpa-prabhū
tatra prathamaṁ pravaktuṁ sva-guroḥ praharṣaṇārthaṁ śrutārthānumodanena pṛcchati—satyam iti | sac-chāstrāṇi śrī-bhagavad-bhakti-parāṇi śrī-bhāgavatādīni, teṣāṁ vargaḥ tasya arthā abhidheyāḥ saparikara-bhakti-tad-upāyādayaḥ, teṣāṁ sāraḥ heya-rahito’ṁśaḥ durlabhaḥ bahula-śāstrābhyāsasya duḥśakatvāt tātparya-vicārādinā durjñeyatvāc ca | saṁgṛhya tat-tac-chāstra-vargata ekīkṛtya me mama pitrā parīkṣitā sva-mātre uttarāyai gūḍho‘pi prakāśita iti yat, tat satyam | prakāśane hetuḥ—kṛṣṇe svasya mātur vā yaḥ premā, teneti ||1||